Plantun de Prouvènço

Pèr coumpara dos planto d'encò nostre

Schedonorus interruptus & Myosotis congesta

Schedonorus interruptus

Poaceae Graminaceae

Nom en français : Fétuque fenasse.

Descripcioun :
La fenasso es uno grando erbo qu'es estado destriado de l'ancian group di petugo faus-canèu, Festuca arundinacea. Li fueio soun pulèu verdalo o rapidamen jaunasso, coume eici. Lou brout (paniculo) èi pulèu estré e se vèi souvènt la cambo. Fau verifica qu'au nous lou mai bas, i'ague, generalamen, dos ramo courteto e bèn dreissado e pu courto que l'entre-nous d'à coustat. Apoundèn que l'arèsto dèu èstre courteto (< 0,4 mm) o mancanto.

Usanço :
La fenasso es uno planto pasturiero que trachis tout de long de l'an.

Port : Grando erbo
Taio : 0,2 à 1,2 m
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Schedonorus
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) flour : 10 à 15 mm
Flourido : Printèms - Estiéu

Sòu : Ca
Autour basso e auto : 0 à 1300 m
Aparado : Noun
Abriéu à juliet

Liò : Prado umido
Estànci : Termoumediterran à Coulinen
Couroulougi : Paleoutemperado
Ref. sc. : Schedonorus interruptus (Desf.) Tzvelev, 1998 (= Festuca arundinacea subsp. fenas (Lag.) Arcang., 1894 )

Te-vese-e-t'ame(-di-flour-sarrado)

Myosotis congesta

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Nom en français : Myosotis à fleurs serrées.

Descripcioun :
Aquéu te-vese-e-t'ame trachis dins li tepiero sablouso, séusouso e umido. Au nostre se vèi soulamen en Prouvènço séusouso. Douno d'èr à Myosotis ramosissima, mai li flour soun mai sarrado, emé de pecou courtet e mens clina. La baso di petalo èi roujo e souvènt gounflo. Pensa de coumpara emé lis autri te-vese-e-t'ame en quichan sus la flècho verdo çai-souto.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").